Loatna oastit aittohuksejuvvon ásodaga dohkkehuvvon prošeavttas
Don sáhtát ohcat loana oastit aittohuksejuvvon ásodaga ásodatprošeavttas man Viessobáŋku lea dohkkehan. Dušše ovdagihtii dohkkehuvvon prošeavttat fállet viessobáŋkoruhtadeami.
Dehálaš diehtu dutnje gii áiggut ohcat:
- Don sáhtát dušše ohcat dán loana oastit aittohuksejuvvon ásodaga prošeavttas man Viessobáŋku lea dohkkehan.
- Dus ferte leat doarvái iežaskapitála vai oaččut loana. Iežaskapitála lea ruhta mii dus alddát lea, mii sáhttá gokčat oasi oastinhattis. Loga eanet "Man olu don sáhtát lonet?"-oasis.
- Dát loatna ii sáhte geavahuvvot oastit geavahuvvon ásodaga.
- Viessobáŋku ii atte oppalaš ruhtadanduođaštusaid, nugo priváhta báŋkkut dahket. Jus don it oaččo loana priváhta báŋkkus, de sáhtát ohcat álggahanloana gielddas.
Ovdal go ozat
Dáinna loanain don sáhtát dušše oastit aittohuksejuvvon ásodaga prošeavttas man Viessobáŋku lea dohkkehan. Huksejeaddji dat ohcá Viessobáŋkkus dán dohkkeheami ovdal go huksegoahtá. Dušše ásodatprošeavttat maid Viessobáŋku lea dohkkehan, fállet viessobáŋkoruhtadeami.
Ásodatalmmuhus ja prospeakta dábálaččat muitala viessobáŋkoruhtadeami birra go Viessobáŋku lea dohkkehan prošeavtta. Jus leat eahpesihkar, de sáhtát jearrat opmodatsoabadallis dahje huksejeaddjis.
Go deavddát loatnaohcamuša, de oidno listu dohkkehuvvon ásodatprošeavttaiguin. Don fertet válljet dan prošeavtta mas háliidat oastit ásodaga.
Du ekonomiija mearrida oaččut go don loana Viessobáŋkkus ja man olu. Dus ferte leat doarvái sisaboahtu máksit loana ja seammás galgá báhcit ruhta máksit eará goluid.
Dus ferte leat iežaskapitála
Dus ferte leat juogo 10 dahje 15 proseantta oastinhattis iežaskapitálan, dan mielde man prošeavttas don áiggut oastit ásodaga. Iežaskapitála lea ruhta mii dus alddát lea, mii sáhttá gokčat oasi ásodaga hattis.
Manne leat iešguđetlágan gáibádusat iežaskapitálii?
Gitta jahkái 2024 gáibiduvvui 15 proseantta iežaskapitála buot ásodatprošeavttain. 2025 rájes gáibádus luitojuvvui 10 prosentii. Ásodatprošeavttain maid Viessobáŋku lea dohkkehan 2025 rájes, ferte dus leat unnimus 10 proseantta oastinhattis iežaskapitálan. Muhto prošeavttain mat dohkkehuvvojedje ovdal 2025, gáibiduvvo dus unnimus 15 proseantta iežaskapitála.
Geahččal loatnakalkuláhtora
Ovdal go ozat, de mii ávžžuhit du geahččalit min loatnakalkuláhtora. Dat čájeha man olu don sáhtát ohcat. Man olu don oaččut, it dieđe ovdal go don leat ohcan loana ja mii leat meannudan ohcamuša.
Don fertet duođaštit iežaskapitála ja vealggi.
Don sáhtát šaddat bidjat mielddusin dáid dan mielde maid leat vástidan ohcamušas:
- Báŋkočállosa dahje gova neahttabáŋkkus mii čájeha iežaskapitála
- Máksinplána dahje gova neahttabáŋkkus mii čájeha vealggi, loatnareanttu ja termiidnamávssu (jus dus lea loatna)
- Signerejuvvon oastinšiehtadusa (jus dat lea signerejuvvon)
- Árvoárvvoštallan dahje e-távstta
- Loatnadokumeantta báŋkkus (jus válddát eará loana ruhtadit ásodatoastima)
- Duođaštusa addis (jus don oaččut skeaŋkka dahje árbbi ovdagihtii)
Maŋŋá go leat ohcan
Mii árvvoštallat du ohcamuša nu jođánit go vejolaš. Áššemeannudanáigi lea golmma vahkus guđa vahkkui, dađi mielde galle ohcamuša mis leat vuordimin.
Jus dokumentašuvdna váilu, de sáhttá ádjánit vel guhkit.
Don sáhtát logget sisa sáddet mildosiid maid it leat sádden, oaidnit maid don leat ovdal sádden sisa dahje dieđihit rievdamiid birra.
Jus Viessobáŋku mieđiha ohcamuša, de mii sáddet dutnje loatnafálaldaga du digitála poastakássii. Loatnafálaldatreivves leat maiddái dieđut viidásit proseassa, signerema, áigemeriid ja eará dokumeanttaid birra maid mii dárbbašit dus.
Okta gáibádus loatnafálaldagas lea ahte don fertet huksegoahtit maŋimustá guhtta mánu maŋŋá. Huksenáigodagas dus sáhttá leat huksenloatna priváhta báŋkkus.
Loatna máksojuvvo go ásodat lea gárvvis ja Viessobáŋku lea ožžon ja dohkkehan buot dokumentašuvnnaid. Ásodat adnojuvvo gárvvisin go leat ožžon gaskaboddosaš geavahanlobi dahje gárvvisduođaštusa, jus dát gáibiduvvo.
Jus háliidat sáddet ohcamuša bábirhámis, de sáhtát viežžat dan neahtas, deavdit ohcanskovi ja sáddet dan oktan dárbbašlaš mildosiiguin Viessobáŋkui.
Don sáhtát sáddet dan min digitála sisasáddenbálvalusa bokte dahje sáddet dábálaš poastan deike: Husbanken, Postboks 1404, 8002 Bodø.