Loatna ođasmahttit ásodaga
Don sáhtát ohcat loana Viessobáŋkkus jus áiggut ođasmahttit iežat ásodaga nu, ahte šaddá energiijabeaktilat ja buoret heivehuvvon eallinahkái. Loatna addojuvvo stuorra ođasmahttimiidda mat geahpedit energiijagolaheami ja addet ásodahkii buoret beasatlašvuođa.
Viessobáŋku ii ahtte loana dábálaš divodeapmái. Muhto oppalaš divodeapmi sáhttá leat oassin prošeavttas, nu guhká go váldoulbmil lea dahkat ásodaga energiijabeaktileabbon ja beasatlažžan.
Vállje rivttes loana
Dát guokte loana dávjá sehkkejuvvoba. Iskka mii loanaid heive dutnje ovdal go ozat:
- Álggahanloatna ja doarjja gielddas: Dutnje gii háliidat heivehit ásodaga agi dahje doaibmahehttejumi geažil, it ge oaččo loana dábálaš báŋkkus. Muhtun gielddain sáhtát kombinere loana doarjagiin. Mana álggahanlotnii ja doarjagiidda.
- Loatna ođasmahttit ásodaga: Dutnje gii háliidat dahkat stuorát ođasmahttimiid mat buoridit sihke energiijageavaheami ja beasatlašvuođa ásodagas. Ovdamearkka dihtii lonuhit dáhki, muhttit boađáhaga dahje installeret heaissa. Jus áiggut ohcat loana dákkár ođasmahttimiidda, de leat rivttes sajis.
Loana birra
Go áiggut ođasmahttit ásodaga, de don sáhtát ohcat loana Viessobáŋkkus doaibmabijuide mat dahket ásodaga sihke energiijabeaktileabbon ja álkit orrut.
Don sáhtát ovdamearkka dihtii oažžut loana jus don ođasmahtát:
- olgorobi, maiddái bieggadivttisteami
- olgoseinniid, maiddái bieggadivttisteami, ođđa glásaid ja uvssaid
Dasa lassin fertet juogo ođasmahttit oktasaš tráhppálanja, dahje čađahit unnimus guokte dáin doaibmabijuin:
- Ráhkadit boarddabánehis boađáhaga.
- Lonuhit olgouvssa dahje ráhkadit ođđa boađáhaga (ovdamearkka dihtii ahte mánnávovdna dahje juvlastuollu čáhká uksaráigge).
- Rievdadit váldogearddi plánačovdosa vai beasatlašvuohta buorrána.
- Ráhkadit uksaráiggiid lasáid haga.
- Ođasmahttit basadanlanja vai šaddá beasatleabbon.
Don sáhtát maiddái oažžut loana jus čuovut Enova gáibádusaid stuorra ođasmahttimii. Don gávnnat buot dohkkehuvvon doaibmabijuid bagadusa 2.5. kapihttalis.
Lea du ekonomiija duohken sáhtát go oažžut loana ja man olu. Dus ferte leat doarvái sisaboahtu hálddašit loana ja seammás galgá báhcit ruhta máksit eará goluid.
Ođasmahttimii sáhtát oažžut loana gitta 100 proseantta ođasmahttingoluin maid Viessobáŋku dohkkeha, nu guhká go dat eai leat eanet go 90 proseantta ásodaga árvvus ođasmahttima maŋŋá.
Geahččal loatnakalkuláhtora
Ovdal go ozat, de mii ávžžuhit du geahččalit min loatnakalkuláhtora. Dat čájeha man olu don sáhtát ohcat. Man olu don oaččut, it dieđe ovdal go don leat ohcan loana ja mii leat meannudan ohcamuša.
Gáibádusat ásodahkii
Ovdal go Viessobáŋku addá loana ođasmahttimii, de don eaiggádin fertet árvvoštallat olles ođasmahttindárbbu, ovdamearkka dihtii Enova energiijaráđđeaddima vehkiin. Dát guoská earret eará materiálaválljemii, energiijameroštallamii ja áibmudančovdosii.
Váldoođasteamis gustojit seamma gáibádusat birrasii/energiijai ja beasatlašvuhtii go ođđa vistti huksemis Huksenteknihkalaš láhkaásahusas (TEK17). Gielda dat mearrida lea go ođasmahttin váldoođasteapmi.
Prošeakta deavdá automáhtalaččat Viessobáŋkku ođasmahttinloana energiijagáibádusaid, jus prošeakta deavdá Enova gáibádusaid 3. dási dahje buoret ođasmahttimii priváhta ásodagain. Geahča eanet detáljaid gáibádusaid birra bagadusa 2.5. kapihttalis.
Ovdal go ozat
Du vástádusaid vuođul ohcamušas mii bivdit du bidjat mielddusin dokumentašuvnna iešguđet ekonomalaš beliin, nugo iežaskapitálas ja vealggis.
Don fertet maiddái bidjat mielddusin dáid dokumentašuvnnaid:
- Rámmalobi dahje álggahanlobi gielddas.
- Julggabeal-, čuohpastat- ja plánatevnnegat
- Dilleplána
- Huksenčilgehus
- Kontrákta dahje šiehtadus huksejeddjiin
- Eanaláigošiehtadusa (jus stohposadji lea láigohuvvon)
Viessobáŋku addá dušše loana jus it leat jo ođasmahttigoahtán. Seammás mii gáibidat ahte don álggahat barggu maŋimustá guhtta mánu maŋŋá go loatna mieđihuvvui. Loana ii sáhte geavahit ođđasisruhtadeapmái
Oza loana
Logge sisa ohcat loana:
Jus háliidat sáddet ohcamuša bábirhámis, de sáhtát viežžat dan neahtas, deavdit ohcanskovi ja sáddet dan oktan dárbbašlaš mildosiiguin Viessobáŋkui.
Don sáhtát sáddet dan min digitála sisasáddenbálvalusa bokte dahje sáddet dábálaš poastan deike: Husbanken, Postboks 1404, 8002 Bodø.
Viečča ohcanskovi
Loatnaohcamuš priváhtaolbmuide – girjedárogillii (PDF)
Loatnaohcamuš priváhtaolbmuide – ođđadárogillii (PDF)
Viečča lassiskovi
Maŋŋá go leat ohcan
Mii árvvoštallat du ohcamuša nu jođánit go vejolaš. Áššemeannudanáigi lea golmma vahkus guđa vahkkui, dađi mielde galle ohcamuša mis leat vuordimin.
Jus dokumentašuvdna váilu, de sáhttá ádjánit vel guhkit.
Don sáhtát logget sisa sáddet mildosiid maid it leat sádden, oaidnit maid don leat ovdal sádden sisa dahje dieđihit rievdamiid birra.
Jus Viessobáŋku mieđiha ohcamuša, de mii sáddet dutnje loatnafálaldaga du digitála poastakássii. Loatnafálaldatreivves leat maiddái dieđut viidásit proseassa, signerema, áigemeriid ja eará dokumeanttaid birra maid mii dárbbašit dus.
Okta gáibádus loatnafálaldagas lea ahte don fertet huksegoahtit maŋimustá guhtta mánu maŋŋá. Huksenáigodagas dus sáhttá leat huksenloatna priváhta báŋkkus.
Go visti lea gárvvis ja gielda lea addán geavahanlobi ja gárvvisduođaštusa, de sáhtát ohcat oažžut loana máksojuvvot. Proseassa lea válddahuvvon loatnafálaldatreivves.
Go Viessobáŋku lea meannudan du máksinohcamuša, de mii sáddet dutnje vealgebáhpára/loatnašiehtadusa maid buot lonejeaddjit fertejit signeret. Loatna máksojuvvo go Viessobáŋku lea ožžon ja dohkkehan buot dokumentašuvnnaid. Viessobáŋku sáhttá geahčadit ásodaga ovdal go mii máksut ruđa.