Smibakken burettslag
Smibakken burettslag i Lindesnes kommune består av sju leilegheiter for unge personar med funksjonshemming. Alle bebuarane eig bustaden sjølv. Dei eig òg fellesrommet med kjøkken, trimrommet, utearealet og personalbasen. Bustaden er tilpassa kvar enkelt bebuar sitt funksjonsnivå og smak. Kommunen leiger personalbasen og yter omsorgstenestene kvar enkelt treng.
Sjå film om Smibakken burettslag her
Resultat
- Prosjektet gir stabile, tilpassa og gode buforhold for sju unge personar med utviklingshemming.
- Bebuarane har kontroll over korleis dei skal bu og kven dei skal bu saman med.
- Unge vaksne med funksjonshemming får auka valmoglegheiter, og får bu slik som andre med den bistanden dei treng frå kommunen.
Bakgrunn
Ei foreldregruppe i Lindesnes kommune starta prosessen med å få bygd bustadar til barna deira som har spesielle behov. Foreldra meinte at dei trengte ein trygg stad å bu, kor dei kunne leve og bli gamle. Foreldra ville sørge for at ungdommane blei «herrar i eige hus». Sjølv om ungdommane hadde funksjonshemmingar, skulle dei altså få bestemme sjølve korleis og kor lenge dei skulle bu, og kven dei skulle bu saman med. Dei skulle ikkje vere vist til kommunale leigebustadar og risikere å bli flytta.
Foreldregruppa ville også legge til rette for at kommunen skulle kunne tilby sine omsorgstenester på eit passande nivå. Ungdommane har ulike funksjonsnivå, men dei kjente kvarandre frå før. Ifølgje foreldra ville dei ha glede av å leve saman.
Prosessen
Foreldra fann ei eigna tomt. Foreldregruppa gjekk så i dialog med kommunen som dei ønska skulle stå som byggherre, og la ungdommane kjøpe bustadane når dei var ferdige. Dette ville utløyse eit solid tilskot frå Husbanken og momsfritak på byggekostnaden. Kommunen var positiv, og nokre månader seinare var saken vedteke og byggeprosessen i gang. Personaldatabasen blei finansiert gjennom lån i privat bank og kommunen gjekk også inn med eit bidrag. Det tok åtte år frå foreldregruppa starta prosessen til ungdommane flytta inn i 2020.
Tomta er på 3421 m2. Smibakken bufellesskap består av:
- 6 bustader på cirka 64 m2.
- 1 bustad på cirka 75 m2.
- 1 bygg med fellesrom på cirka 80 m2.
- 1 personalbase på cirka 70 m2.
Brukarmedverknad
Byggherre (kommunen) trakk inn konsulentselskap, arkitekt og bebuarar med foreldra i utforminga av bygget. Bueiningane er like i areal, men heilt forskjellig utforma. Kva enkelt bebuar fekk vere med på å finne løysingar og velge fargar etter eigne ønske, behov og funksjonsnivå. Arkitekten hadde eit eige møte med kvar bebuar og verge, for å sikre individuelle løysingar i kvar leilegheit.
Dersom nokon flyttar eller fell frå, skal styret til burettslaget godkjenne nye bebuarar etter ein statutt sett opp på førehand.
Finansiering
Total kostnad var på 32 millionar kroner. Kvar enkelt bebuar har betalt 2,1 millionar kroner (i snitt) for si bueining.
- Startlån/eigenkapital: 12,1 millionar kroner
- Investeringstilskot: 10,4 millionar kroner
- Momskompensasjon: 5,6 millionar kroner
- Lån til personalbase: 2,7 millionar kroner
- Kommunen sitt bidrag: 1,2 millionar kroner
Kommunen har inngått ein avtale med burettslaget om å leige personalbasen i 30 år.
Tips til andre
- Start tidleg. Slike prosessar tek tid.
- Ver aktiv sjølv. Ikkje vent på at kommunen skal ta initiativ.
- Organiser tiltaket som eit burettslag. Viktig for å få tilskot frå Husbanken.
- Få kommunen med på å stå som byggeherre, Det utløyser både investeringstilskot og momskompensasjon.
- Få kommunen til å leige personalbasen av burettslaget. Leigeinntekta betaler lånet.
Les meir
Personar med nedsett funksjonsevne skal kunne bu like godt som andre