Eige først for barnefamiliar i Kongsvinger
Kongsvinger kommune har over fleire år testa ut «eige først» for familiane som ikkje oppfyller vanlege kriterium for å få startlån. Familiar som er delvis avhengig av sosialhjelp til bustadutgifter, men som har eit inntektspotensial til å bli økonomisk sjølvhjelpte på sikt, får moglegheit til å kjøpe bustad ved hjelp av startlån.
Startlånet er avdragsfritt så lenge familien er avhengig av sosialhjelp. Sintef har følgt prosjektet over tid og har dokumentert resultat så langt.
Resultat
- Betre livskvalitet for familiane som er intervjua
- Opplever tryggleik, meistring og kontroll over eigen busituasjon
- Stoltheit og glede over å eige eigen bustad både for foreldre og barn
- Auka motivasjon for å ta vare på eigne omgjevnadar
- Auka motivasjon og kapasitet for å lære norsk og få fast jobb
- Fornya håp og tru på framtida
- Opplever å bli ein del av eit nabolag og høyre til (betre integrering enn å leige)
- Betre økonomi, moglegheit til å bygge opp arv til barna
Bakgrunn
Økonomisk vanskelegstilte barnefamiliar bur ofte trongt og ueigna, og busituasjonen kan vere eit hinder for foreldra sin overgang til arbeid/aktivitet. Å bu trongt kan føre til sosial ekskludering og påverke skulegangen til barna negativt. Oppseielege leigekontraktar bidreg til ustabilitet, manglande moglegheit for å påverke bustaden og manglande kontroll over framtidig busituasjon.
Mål
Målsettinga var ein betre busituasjon og moglegheit for at foreldre og barn kan utnytte potensialet sitt.
Beskrivelse av prosessen
Steg 1: Snakke med familiane, forklare konseptet «eige først» og få aksept for at dei forstår og er interessert i modellen.
Steg 2: Avklare potensial for framtidig inntekt og yrkesdeltaking.
Steg 3: Avklare med sosialeininga at dei ville supplere renter på startlånet dei månadane det er naudsynt.
Steg 4: Innvilge startlån og tilskot til etablering for å kunne kjøpe bustad og tilpasse han til familien sine behov.
Steg 5: Familien går på visningar og vel ut bustaden. Kommunen samtykker i val av bustad.
Steg 6: Signere opsjon på tilbakekjøp dersom familien ikkje er økonomisk sjølvhjelpt innan ein avtalt periode. Tinglyse urådigheit på bustaden slik at familien ikkje kan selje bustaden utan samtykke frå kommunen.
Brukarmedverknad
Familiane vel sjølv ut bustadane dei ønskjer å kjøpe.
Finansiering
Startlån til å finansiere bustadkjøpet og naudsynt utbetring. Eventuelt tilskot til etablering frå kommunen sitt eige rammetilskot til formålet.
Utfordringar undervegs
Det har vore utfordringar knytt til språk og det å forstå kva forpliktingar bustadlån og eigen bustad inneberer. Oppfølging i etterkant krev også mykje ressursar.
Tips til andre
- Start med éin familie
- Familien må vere aktivt involvert og motivert til å bli bustadeigarar og til å auke inntekta si
- Ha klare målsettingar
- Sett av tilstrekkeleg med ressursar
- Sørg for brei tverrfagleg einigheit og samarbeid
- Arbeidet må vere leiarforankra
Vidareføring av arbeidet
Dei førebelse resultata frå «eige først»- prosjektet er gode. Kommunen har difor vedtatt å vidareføre metodikken som eit alternativ for dei barnefamiliane som det ikkje finst andre gode løysingar for. «Eige først» er krevjande for både deltakarar og kommunen, og det er difor avgrensa kor mange barnefamiliar kommunen kan tilby metodikken til.
«Eige først»-arbeidet har bidrege til å auke fokuset på vanskelegstilte barnefamiliar i kommunen og busituasjonen deira. Bustaden si betyding har kome høgare på dagsordenen. Mange av dei familiane som blei søkt inn til prosjektet, men ikkje kom med, har fått endra busituasjonen sin til det betre. Nokre familiar er tildelt startlån på ordinært vis, mens andre har fått langtidsleige i eigna kommunal bustad.