Veahkki dutnje gii láigohat dahje láigohat olggos ásodaga
Viessoláigonággolávdegoddi (VNL) lea stáhta doaibma mii viessoláigolága vuođul meannuda nákkuid mat čuožžilit láigolačča ja láigoheaddji gaskka viesu láigoheami dáfus. Min áššejođiheddjiin lea sierragelbbolašvuohta viessoláigorievtti suorggis. Mii meannudit áššiid Viessoláigonággolávdegotti láhkaásahusa njuolggadusaid vuođul.
Áššit gusket earret eará viessoláigovealgái, buhtadussii, eretcealkimii, depositummii ja viesu váilevašvuođaide. Mii čoavdit áššiid soabadallama dehe čálalaš mearrádusa bokte.
VNL čađaha čálalaš áššemeannudeami. Váidima, vástádusa ja lassidieđuid digitála skoviid gávnnat siiddus «Send inn klage til Husleietvistutvalget» (dárogillii).
Mo mii bargat?
VNL fállá soabaheami áššiin maid mii oaivvildit heivejit čovdojuvvot nu. Soabaheamis oažžu láigoheaddji ja láigolaš veahki neutrála soabaheaddjis gávdnat áššái čovdosa. Jus áššeoasálaččat soabadeaba soabaheamis, de čállit mii geatnegahtti šiehtadusa. Dat šiehtadus gohčoduvvo soahpamuššan Jus ášši ii čovdojuvvo soabaheamis, mearrida VNL ášši mearrádusain. Mearrádus lea geatnegahtti jus ii goabbáge áššeoasálaš vuojit ášši diggeriektái.
Dus lea riekti oažžut veahki sámegillii
Sámegielagiin lea riekti gulahallat VNL:in sámegillii. Dat mearkkaša earret eará ahte sámegielagiin lea riekti sáddet váidaga, váidaga vástádusa, proseassačállosa ja eará čálalaš oktavuođaváldimiid sámegillii.
Vuoigatvuođat ja geatnegasvuođat láigodilis
Sáhttet čuožžilit soahpameahttunvuođat láigodilis, omd. depositumma, viessoláiggu, vahágiid, eretcealkimiid dahje bajásdoallama birra. Olu nákkuid sáhttá čoavdit jus áššeoasálaččat ožžot bajilgova das mii lea šiehtaduvvon, ja mat njuolggadusat gustojit.
Jus don háliidat lohkat eanet vuoigatvuođaid ja geatnegasvuođaid birra láigodilis, de gávnnat eanet dieđuid dán birra min eará siidduin. Dát gávdnojit dárogillii ja eaŋgalsgillii.
Dárbbašat go juridihkalaš ráđđeaddima?
VNL lea bealátkeahtes orgána, ja buot áššit mat devdet meannudeami eavttuid árvvoštallojuvvot objektiivvalaččat. Danne go mii leat bealátkeahtes orgána, de mii eat sáhte addit juridihkalaš ráđiid. Jus dárbbašat juridihkalaš veahki, de gávnnat dieđuid dan birra dáppe.